Digitized with ABBYY FineReader 12.1.11, checked and codified in TEI for the ELA-Eurasian Latin Archive
Jubilaei anni sancti 1550 plenissima concessio pontificia, pro Oriente.
Dilecto in Christo fratri, Magistro Francisco Xavier, praeposito generali eiusdem Societatis in Indiae regionibus, serenissimo regi Portugaliae subiectis, et ultra eas; necnon aliis omnibus et singulis praepositis particularibus vel aliorum curam gerentibus ab eodem Francisco in dictis regionibus constitutis, salutem in Domino sempiternam.
Cum hoc anno MDL de divitibus Domini nostri Iesu Christi et sponsae eius Ecclesiae ac Sedis Apostolicae thesauris quattuor ecclesias Romae invisentibus iubilei gratia, id est, peccatorum plenissima remissio condonetur; cumque vos ac reliquos christianos, quibus ad hanc almam urbem, tot terrae ac maris tractibus disiunctam, venire non permittitur, ah huiusmodi gratia non excludi aequum censeremus, sanctissimo D.N.Domino Nostro Domino Iulio, divina providentia Papae tertio, ut vobis, absentibus corpore, praesentibus tamen animi devotione, eandem gratiam impertiri dignaretur, supplicavimus et obtinuimus; eam tamen proprio motu adiecit conditionem, ut qui de nostra Societate isthic laboratis in vinea Domini, cum omni, ea in parte, Sedis Apostolicae auctoritate, gratiam hanc, quibus in Domino videretur, et ea imponendo, quae vi[p. 44]derentur, dispensaretis. Nos igitur te, cuius prudenti et piae dispensationi tantum thesaurum committi posse confidimus, et eos, quos ipse tu, non sine delectu virtutis (ut indubitanter credimus) in variis locis aliis praeposuisti, vel eos de Societate, qui curam aliorum gerunt quocumque modo, ad huiusmodi gratiae ministrationem per se vel alios, quos idoneos iudicaverint, designamus, et potestatem a Sede Apostolica habere conferendi iubileum omnibus, sub obedientia Societatis degentibus, et Christianis aliis, incolis istarum regionum ad fidem conversis, seu advenis quocumque modo ibi agentibus, qui, vere confessi, ea fecerint, quae vos eisdem imponetis, declaramus, et ut non tantum fideles, sed et prudentes dispensatores tantae gratiae ad Dei gloriam et animarum salutem vos exhibeatis, et in Domino plurimum exhortamur.
Datum Romae, in aedibus Societatis Iesu, nonis Iulii 1550.