Sunt intra Provinciam Japonicam de Societate omnino 44: in Collegio Amacacesi 36; sit ne quis Nostrum in Japonia non constat. In Missione Tunkinica quinque; in Cocicinica, Macasarìca, Cambogensi unus in singulis; in Haynanica nemo. Ab anno 1650 inclusive usque in hanc diem admissi in Societatem 19, dimissi 7, vita functi 14.
Habet haec Provincia redditus qui sequuntur: ex locatione domorum singulis annis recipit 518 argenteos, quibus alere potest ad summum sex e Nostris; nam in domorum restauratione reddituum partem insumit. Pecuniam quam vocat Orphanorum accepit mutuam ad mille et quinque argenteos. Ad haec solvit Provincia quotannis Seminario Japonico pro accepta inde pecunia 334 argenteos. Ab anno 650 ad hunc annum labentem damna in pecunia, aliisque rebus passi sumus ad 4.884 argenteos. Annui Provinciae redditus in India fere accedunt ad quatuor mille argenteos, quos vulgo Patacas appellamus. Redditus, quos olim habebat ex negotiatione a Summo Pontifice huic Provinciae permissa, modo sunt exigui aut pene nulli propter interclusum in Japonia et Manila cum hac civitate comercium. Indiget duodecim mille argenteis ad annuam Nostrorum sustentationem. Ad 56 millia xerafinorum ascendit aes alienum ab hac Provincia contractum Amacai, in India et Lusitania, ubi ad sumptus in Europa necessarios redditus habet exiguos, quos refert ex praedio Carcavelli. Nihil ex aliena largitate nacti sumus ab anno 650 ad hunc annum. Reliquum aerarii ad septem mille argenteos fere ascendit.
[1118] Collegium Amacaense
In Sinensi Imperio Collegium habemus Amacaense, Japonicae Provinciae caput. Sunt in eo 36 omnino e Nostris, quorum sunt sacerdotes 20, scholastici approbati duo, reliqui coadiutores, uno e sex tyronibus excepto, qui in scholasticum fuit admissus. Habet Collegium decem domos locabiles, ex quibus singulis annis recipit 313 argenteos, quibus quatuor capita vix ali possunt. Ad haec habet praedia duo ad aegrotorum levamentum et solitam recreationem. Alterum, quod Insulam Viridem appellamus, terrae fructibus, quos inde recipimus, aegre sumptus exaequat. Alterum (dicunt Oytem) gregi et armento pascua suppeditat. Collegio vero deductis expensis non amplius hactenus quam 100 argenteos. Sperant tamen rerum periti fore ut annis insequentibus, si res e voto succedat, recipiantur inde argentei 500. Non tenetur ex ulla obligatione Collegium ad docendas scientias aut litteras, quod hactenus careat fundatione, sed ex charitate dumtaxat classes olim aperuit. Hoc anno grammaticam superiorem et infimam, elementa litterarum, necnon arithmeticam, cum musicis numeris pueros docet. Octo sociorum Collegii redditibus, reliqui Provinciae aluntur impensis.
Japonia
In Japonia annis propius elapsis socii degebant duo, de his quid actum sit, vivantne, an vixerint, propter interclusam illuc navigationem plane non constat, ut eos propterea in numerum sociorum supra positum recensendos visum non fuerit.
Missio Cocincinica
Missioni Cocincinicae, quam nunc unus tantum Pater moderatur, debet Provincia Japonica [168v] 2300 argenteos, quos ad illius Residentiae fundationem nobilis faemina legavit, ea lege, ut ex commercio japonico lucro augerentur, donec ad eam summam perveniet, quae praedictae fundationi sufficeret. Verum propter interclusum commercium nondum huic oneri Provincia satisfecit. Quare et summam ipsam, et, si Paternitati Vestrae videbitur, cum lucra inde cessantia, tum damna emergentia debet Missioni Cocincinicae.
Missio Tunkinica
In Missione Tunkinica quinque degunt Patres in quinque Residentiis. Nulli Missioni sunt redditus. Sumptus illi necessarios Provinciae (ut dictum est) aerarium suppeditat.
Missiones reliquae.
Haynanica, Cambogensis et Macazarica Missio Provinciae aluntur impensis, quod hactenus careant fundatione. Primam nemo obtinet. Reliquarum singulas unus duntaxat excolit operarius.