Digitized with ABBYY FineReader 12.1.11, checked and codified in TEI for the ELA-Eurasian Latin Archive
1. Videatur num conveniat Romae, et etiam in Lusitania aut aliis in Iocis ut Goae vel Cochim, consilium designatum habere hominum qui iuditio, rerum usu et charitatis affectu valeant rebus indicis consulere. Vel certe Romae, asistentibus Generalis Praepositi et aliis in locis consultoribus Provincialis, ea cura demandetur, ut cogitent, inter se conferant et ad superiorem referant quae iuvare possunt ad conservationem et augmentum novorum christianorum, quae etiam media ad sinas, brasilios ac alios ad fidem trahendos conferre possint [ ].
2. De episcopo iaponensi – An episcopum aliquem iapponensibus praefici conveniat ut promoveri possint aliqui ad ordines sacros; et tunc quo modo tractandum sit ea de re [ ].
3. De pueris domi tenendis – An in huiusmodi locis remotissimis retinere poterunt nostri domi suae pueros quos instituendos susceperint, ut fit Goae et alibi, et si omnino id conveniet an distinctum refectorium et habitationes saeparatae nostrum et illorum esse debeant. Et statuatur quomodo Constitutiones nostrae in huiusmodi locis observari in hac parte debeant [ ].
4. De provinciali vel commisario iaponensi – An expediat iapponensibus provincialem seorsum ab Indiae provinciali [126] praeficere, an commissarium aliquem qui subsit provinciali Indiae et praesit omnibus nostris qui in ea regione versantur, quando quidem perdifficile est commercium et rarum cum Indiae provinciali. Et ad unum aliquem recurri oportet ex locis variis eius provinciae, sic in Malucis et Amboino et Moro.
5. De cantu – An permitti debeat cantus in India et aliis in locis remotissimis, quanvis in Europa non sit Societatis concessus, si animadvertetur eas nationes ad Dei cultum et spiritualem profectum ex eo iuvari, ut Goae observatum est, et in Ethiopia.
6. De cura hospitalium – An permitti debeat illis in regionibus munus suscipere regendi hospitalia, ut Goae, Punicalli et Bungi fit, cum alii externi non sint idonei ad hoc prestandum vel cum ad aedificationem magnam id fore videtur; an quando statui oporteat, ut curent per alios haec fieri. Sed si alii non fuerint idonei, tunc ut ipsi id possint praestare [ ].
7. De mortis periculis obeundis – An declarari expediat qui modus tenendus sit a nostris in vitae periculis subeundis vel declinandis, ne martirii sanctum desiderium ad mortem parum discrete et utiliter obeundam, imo cum damno probabili divini obsequii, adducat.
8. Et e contrario, ne nimia cautela sub discretionis pretextu abducat a testimonio fidei ac religionis nostrae reddendo ad Christi gloriam, vel a proximorum salute promovenda. Ac peculiariter quid censendum sit de modo illo quo pater Criminalis [127] se morti exposuit et de illo quem attingit pater Melchior Nunes ad sinas reducendos ad Christi fidem.
9. De Indis Societate admittendis – Videatur an ex incolis illarum regionum aliqui apti reddi possint ad Institutum nostrae Societatis suscipiendum, sive Goae instituantur, sive in Lusitaniam, vel alia Europae collegia mittantur, ut postea vernacula lingua suos iuvare, et per eos Societas augeri et durare illis in locis possit, ne sit necessarium perpetuo operarios ex his locis mittere. Quod si non in omnibus, certe in quibusdam regionibus aliqui videntur eligi posse qui ingenio et indole prae caeteris pollere videantur.
10. Ut nostri linguas addiscant – Nostros etiam ex Europa missos, linguas addiscere huiusmodi nationum oporteret, et arte ac usu ad id iuvari, siquidem indole ad id praediti censerentur.
11. De indigenis ad Christi opus applicandis – Videatur an alii ex indigenis apti reddi possint ad conversionem et conservationem aliorum, licet de Societate non sint, sive ad ordines sacros promoveantur sive laici permaneant, et quomodo.
12. Ut qui praesunt benignitatem subditis exhibeant – Quandoquidem per chrisianorum qui praesunt inhumanitatem [128] ac charitatis defectum impedita fuit hactenus quorundam infidelium conversio et aliorum iam conversorum profectus, studendum videtur, per reginae pietatem ac zelum gloriae Dei, ut prorex Indiae benignum se eis exhiberet et alios praefectos humanos ac pios eis praeficeret. Tunc enim etiam temporalia magis prospere cederent, ut sperandum est, si Christi negocium serio aferetur.
[Juan de Polanco]